› 選擇地區
三藩市
紐約
洛杉磯
其他美國地區
香港 台灣 北美
 
2019年10月22日

【福建幫瓦解】優品360出事 馬亞木變臉痛批林子峰 陳秉志突變佛山人

馬亞木(左三)、陳秉志(右二)
建立時間 (HKT): 1022 20:26

一場社會運動,令「福建幫」三字聲名狼藉,連見慣大場面嘅「小巴大王」馬亞木都怕怕,公開同昔日搵錢拍檔、來自福建嘅優品360(2360)老闆林子峰光速割席,聲稱同佢其實一啲都唔熟;而一向被視為係「福建幫」翹楚嘅「磁帶大王」陳秉志,更加連籍貫都改埋,話自己其實係廣東佛山人先至真。

相關新聞:【港鐵外判保安】曾拍林子峰奪標 IWS大股東活躍於領展商場競投

自從優品360被質疑同「北角福建幫」有關,唔少激進示威者幫呢間零食店「裝修」。今日國際永勝(8441)嘅上市儀式上,作為主人家嘅小巴大王罕有主動向華華澄清,話同林子峰嘅生意合作已經係好多年前嘅事,依家已經冇來往,「我同林子峰真係一啲都唔熟,今日上市儀式都冇請佢嚟!」仲話同林子峰做生意嘅風格唔同,「我係做實業,投資物業咁耐都係有買冇賣。」仲再三強調自己係潮州人,唔係福建人。

另一邊廂,作為「香港福建希望工程基金會鑽石贊助人」嘅陳秉志,幾十年嚟都被外界視為福建人,更同林子峰喺唔同嘅投資項目拍住上,例如買領展(823)商場齊齊搵錢。不過唔知點解,佢今日突然拒認自己係福建人,話世人誤會咗佢,其實佢真正鄉下喺廣東南海佛山,係佛山人呀!

相關新聞:【新股】港鐵外判保安IWS上市曾爆升125%

究竟佢哋有幾唔熟?華華問過Google大神,公開資料話3人都係市場出名嘅資深物業投資者,2017年曾經合資以11.5億元買入青衣長康商場;講近啲,今年1月優品360掛牌,小巴大王同陳秉志都齊齊晨早起身撐林子峰,畀面出席上市儀式。究竟係咩原因驅使3位嘅友情褪色?係時間,距離,定係利益?係「裝修」啊陰功豬。

面對昔日有錢齊齊搵「好友」嘅冷言冷語,華華問過林子峰,睇下佢有冇嬲嬲豬,佢透過公關話唔回應喇。今次真係如人飲水冷暖自知。

李華華

關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載