「香港人！反抗！」這是膠叔叔在facebook網頁的自我介紹，他是中年大叔，由和理非變勇武，雖不是最前線的「衝衝子」，卻是中後排支援的手足，後來成為逾2,000個被捕人士之一。逆權運動以來，兄弟爬山，文宣、《榮光》、書報畫作，各自努力。拒絕成為沉默的幫兇，將自己多年砌積木功夫發揮出來，製作前線勇武、前線記者、前線急救員、「獅鳥」等7款積木公仔，希望為今次運動做記錄。原本沒想過販賣，但一發帖換來手足支持想買隻，「朋友講得啱，如果將呢個創作系列變成產品，可以借呢個機會籌錢，捐助今次支持抗爭嘅機構，幫助佢哋等於幫助每位手足。」於是決定透過眾籌網Kickstarter，扣除成本所得收益將撥捐星火同盟，「因為我真係受過佢哋（星火）幫助，我係其中一位被捕人士。」
膠叔叔之前是和理非，後來變勇武，6.9百萬人上街，林鄭政府一意孤行，6.12再上街，「當天一早到夏慤道，第一次知道催淚彈係咩味道。當時係咩gear都無，當然好嬲、好驚喇，第一次咁近距離見到防暴警察、速龍，但好好彩，好多兄弟好多手足出來，令惡法無法通過。」
「咁耐以來，睇住政府、警權不斷膨脹，咁多手足受傷、被捕，警察發咗4,000幾發催淚彈，我哋講緊今日2,000幾個手足被捕，甚至乎有咁多人失蹤。我哋已知，死咗好多手足。除咗好嬲，我感覺好無奈，嗰種無力感非常大，覺得其實我哋每次上街，但都仍然得唔到呢個政府正面回應我哋嘅訴求……係咪要再做一啲激進啲嘅嘢去衝擊政府？」
逆權運動以來，他看見很多從事藝術創作的朋友各展所長，畫作、音樂甚至各種媒體方式進行文宣。鍾愛並精於砌積木的他都想略盡棉力，透過積木砌出一系列逆權運動的作品記錄這段歷史，「最初創作3個角色，包括前線勇武、前線記者、前線急救員。我諗整場運動嘅核心係呢3種身份嘅人，大家手拖手，一齊對抗暴政。」後來出現「獅鳥」，就新增這個角色，將獅子和鳥合而為一，送牠一對翼，讓牠四圍飛去懲治壞蛋。
「最初呢啲作品純粹喺網頁分享，無諗過做成實物，直到一位朋友提議眾籌。我答佢我無諗住賣，佢話唔係喎，好多人好有興趣。的確開咗膠叔叔專頁，好多網友問：『你啲公仔好得意，有無得賣？』我諗一諗，其實朋友講得啱，如果將呢個創作系列變成產品，可以借呢個機會籌錢，捐助今次支持抗爭嘅機構，幫助佢哋等於幫助每位手足。」計劃透過眾籌網Kickstarter進行籌款，「如果籌到錢捐去邊？第一個諗就係星火同盟。因為我真係受過佢哋幫助，我係其中一位被捕人士。嗰日係差館，佢哋唔畀我聯絡屋企人，我話要聯絡律師，佢哋畀我打一個電話，當時除咗屋企人電話之外，我記得就係星火同盟熱線。佢哋幫助咗我，聯絡我屋企人，幫我安排律師落口供，甚至乎被捕後提供法律支援及意見，都無收過1蚊。」目前膠叔叔仍處於保釋期。
今次建議進行眾籌是認識膠叔叔十多年的老友Arthur，自認和理非，雖然老友變勇武，「只要不違背初衷，我係唔會反對任何踩界行為，例如阻止政府運作、公共交通運作，令政府關注市民訴求。（初衷係咩？）五大訴求。」他記得觸發進行眾籌是8.12機場靜坐，「咁多人支持運動，咁多人想去幫助更多手足，有咩方法呢?除咗和理非、前線企出來活動，係咪可以向國際表達訴求，令更多人支持香港人？」
捐錢不單是資金援助，「我自己都有直接捐款，相信有能力捐款嘅人已經捐款，但捐款無話足夠。我可以應用一句：『兄弟爬山，各自努力』，希望盡一分力。香港人會自發捐款，但外國人未必有一個渠道可以捐款畀我哋嘅機構」，所以透過國際性眾籌網Kickstarter進行籌款，「一來向世界做文宣，另一方面方便外國人士捐款。」他指出，由於設計題材非常敏感，堅拒尋求大陸廠商生產，轉投本地及外國廠商。目前定價，人形積木公仔每款約148元，「獅鳥」積木公仔每隻296元，眾籌目標50萬元。
-----------------------------
2019區選專頁
光復香港 11.24踢走共產黨
-----------------------------
【撐學生】
召集有心人 撐學生全年睇《蘋果》
立即按此
