› 選擇地區
三藩市
紐約
洛杉磯
其他美國地區
香港 台灣 北美
 
2019年11月22日

【我的置業故事】每人月儲1.25萬元 中產夫婦4年買兩層樓

建立時間 (HKT): 1122 00:00

何生已不是第一個再次搵蘋果驗樓的讀者。4年前蘋果驗樓幫何太驗收660萬元鴨脷洲新盤,如今喜獲麟兒,在父母資助下,自嘲「低等中產」的他們將4年逾100萬元積蓄再買多1層新樓,是成交價達800萬元的元朗PARK YOHO Napoli 2房特色戶。

相關新聞:【我的置業故事】二千萬樓畀一半首期 80後陳太:投資賺番嚟,冇得教!

4年買兩層樓有何心得?何生笑言:「瑞士卷分兩日食,哈哈!咁同劉生(劉鳴煒)講去少次旅行有無分別呢……」收起笑聲,他認真地說,在香港買樓絕不容易,今次除了是父幹族,兩公婆一直努力儲蓄及工作,「每人每年儲15萬元,算唔算多?盡力囉,慳啲,做吓兼職,每日瞓少兩個鐘,夜啲收工囉。」

何氏夫婦分別從事教育界及銀行界,何生自嘲是「低等中產」,但實情好景時他個人月入觸及「5」字頭。2015年何太以個人名義用約660萬元買入一個鴨脷洲新盤,當時已支付超過100萬元做首期,2017年收樓時驗樓評分80分。4年來,屋苑升值,比自己單位高幾層的同座同面積單位以780萬元沽出,保守估計他們的單位升值約15%。何生說:「升兩成就一定無。無得講滿唔滿意,慶幸呢段時間唔等錢使就算㗎啦。買樓我當儲錢,升幅唔多,但無嘅,又無樓市水晶球,如果買樓要賺最大升幅,咁就唔使等4年,買場馬都得喇!」

相關新聞:【我的置業故事】沽深圳樓賺兩球返港買樓 港人:大灣區非遍地黃金

今年6月,何生用自己名義以約800萬元買入元朗PARK YOHO Napoli 2房特色單位,另連平台,支付4成首期,父母資助約200萬元,他倆將4年來100多萬元積蓄做首期。4年內買第二層樓,「都係父母幫手,自己又儲啲,老婆又儲啲,connect埋一齊。因為BB出世,想有個大少少地方畀BB走圍郁吓。嗰個單位(鴨脷洲單位)係1房,而家有BB又有工人,住唔到。當時能力就係買嗰陣時嘅樓,你諗唔返之前嘅嘢。而家咪買住呢一間先,之後再作打算。」4年來如何儲多100幾萬元?他笑言:「瑞士卷分開兩日食,哈哈!咁同劉生(鳴煒)講去少次旅行有無分別呢……」然後他收起笑聲,認真地說:「查實每人每年儲15萬元,算唔算多呀?盡力囉。慳啲囉,做下兼職,每日瞓少2個鐘,夜啲收工囉。」

他們一直目標是2房單位,荃灣新盤睇過,將軍澳不考慮,元朗新樓面積較大、空氣較好,且被新樓會所吸引,讓小朋友嬉戲。他一邊說,一架軍用直升機從頭頂飛過,料往附近石崗軍營,戴住面具的他說:「唔係嘛,有無落螢光粉末?自己屋苑蒙面都唔得!」機已過,笑講完,他續稱:「衡量過唔同地方,呢度啱心水啲。出元朗市中心駁一程小巴,當自己住西貢或村屋,呢啲都係駁一程小巴,接受到嘅。不過呢度多蚊囉,可能要落蚊帳。」至於不買二手樓都是擔心突然殺出大維修,亦不知屆時將會涉及何等天價維修費,「新樓預咗三、五、七年都唔搞你住啦!」

他在6月上旬簽訂臨約,記者10月中接觸他時,他曾表示憂心忡忡,因為拍板買多1層樓後,就是6.12、7.21、8.31……無數港人無法忘記的日子,「我係6月x日簽約,驚!睇到呢幾個月,啲樓價沉一沉,個心都沉一沉。自己都有出來遊行,相信香港人會做得到。沙士都過到,我哋好多嘢都過得到。我再諗,沉,都係一下,自住唔使諗咁多。」

手執兩層樓,目前有不同未來方案,「1房(鴨脷洲單位)可能會賣,減一減磅,唔關政局事,供到啫,但都吃力。同埋呢度係偏遠少少,可能住一段時間發現每日瞓少好多覺,想出返去市區,到時睇吓點變動資產。例如真係發覺元朗交通差啲,都係出返去市區,就賣咗件1房,唔排除換入一個平平地、無會所嘅2房二手樓。」目前兩公婆各自名義都持有1層樓,名用盡了,再買樓,不了,因為太重稅。

PARK YOHO Napoli來去水零分 詹Sir:驚水喉佬被自殺

何生說,購入單位時,發展商包全屋傢俬,如果不要全屋傢俬,發展商會在樓價回贈1萬元,結果他選擇傢俬。負責驗收單位的詹濟南「詹Sir」話連傢俬也照樣驗,被衣櫃或睡床遮擋的牆身或地板,如果出現空鼓,只要單位或鄰居沒有進行大型室內裝修工程,理應不會令問題惡化。不過如果可以移動,稍為移開衣櫃,盡可能檢查牆身有無空鼓。與詹sir同行徒弟康仔幫手驗過,全屋牆身均沒有空鼓問題。

詹Sir走出平台,指着地磚說:「鋪磚設計有問題,將2塊地磚水平般編排好睇啲。但而家一塊前一塊後,令到磚邊出現弱點位,弱點位容易撕裂。如果換件新磚,曬多兩曬,又再裂過。撕裂2.0除咗惡毒,仲係好難搞。而家修補好過更換,補最多唔好睇,換完都仲係裂。」他又指,平台玻璃圍欄下石材撞崩,「石材係可以接受修補,但修補完應該要好睇啲。點為之好睇,應該離開2米去睇,睇唔到覺眼,為之收貨。而家呢度太遠都睇到係啦,所以係唔收貨。而家用雲石膠補係啱,但花崗岩凹凸不平好難補得靚,要花心機,所以修補漏洞要做好啲,唔好亂咁修補,有時越修越樣衰。手法要好,唔好係又補,唔係又補。」

單位採用開放式廚房,正是今次扣分最嚴重的地方,因為溢水口溢水喉漏水,滴到櫃底一灘水,令到來去水項目捧蛋,連同門及窗少許瑕疵扣分,單位驗樓得分90分。詹Sir笑言,來去水1項工種拖累得分,「我相信水喉佬會被自殺!」

記者:陳家雄
攝影:細釗

【我的置業故事】二千萬樓畀一半首期 80後陳太:投資賺番嚟,冇得教! 【我的置業故事】沽深圳樓賺兩球返港買樓 港人:大灣區非遍地黃金 【我的置業故事】80後張太曾心灰:「係咪一世租樓」 堅持儲蓄終抽中新居屋 【我的置業故事】23歲囝儲40萬 慈母資助一半首期買180呎劏房 【我的置業故事】跑龍套680萬買啟德新樓 「如果仲留喺TVB,我買唔到樓」 【我的置業故事】15秒揀樓瘋狂記 中學老師:買千萬樓比買菜兒戲 【我的置業故事】6年月儲逾萬元上車 90後:自住樓點會唔怕跌! 【蘋果驗樓】直擊南昌一號「四房神則」 業主:放到床多間房有咩唔好! 【我的置業故事】葡萄同學買樓年賺百萬 90後王小姐:產後抑鬱去買樓 【我的置業故事】「長實粉絲」沙士194萬買凱帆軒換到2,300萬愛炫美 【長實設計】灶頭2呎有消防花灑頭 消防專家:太近爐頭有機會「爆頭」 【逆權運動】680萬君豪峰業主:樓價跌、錢賺得番 但傷害大家嘅心非錢能衡量 【我的置業故事】330萬新盤無洗衣機 業主:現代人唔需要太多空間 【我的置業故事】租樓十年後二千萬買新盤 李太:樓價長遠升,因為我買咗! 【我的置業故事】35歲單身漢買龍床盤 「我屋企得164呎咋,我諗女仔即刻掉頭走!」 【上車的故事】兒子收新樓 母親擰擰頭:「500幾萬樓啲嘢係一般!」
關心你飯碗,貼近你生活,即Like「蘋果ATM」FB專頁!
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載